<<Dinto glio meso d’ottobra se semmena lu lino. Pò alla fine de maggio se cava e se fa a matturiegli: s’attaccano alla ponta e venno a mazzucchiegli, pecchè ce sta la semente. Se spagne pe tterra. Pò, quanno è fatto na quindicina de iuorni, se piglia e se sbatte, pè lo fa spigolà; poi se fa a torse e le femmene se lo mettono ncapo e lo portano aglio fuosso degli Caudarari: pò qua, lo mettono dento l’acqua e ci mettono le prete ncoppa pe lo fa acchiappa’ sott’acqua. Ncapo de otto iuorni lo cacciano e lo spagnono a uso regne, all’erte e po lo passano alla ‘macenola’; mo s’é fatto stoppa e livoro ammescato. Pigliano n’attrezzo, na raspa, na tavolella co parecchi chiuovi ritti ‘nmiezo e lo cardano: la stoppa rimane e glio livoro glio tirano, la stoppa l’arravogliano.

Quanno pare a issi conocciano la rocca, l’attaccano co no spago e poi le femmene se la mettono a fianco e filano co glio fuso: tirano la stoppa l’abbagnano co glio salimo e se mettono glio fuso dinto le mani e glio fanno aggirà e la stoppa s’arravoglia facenne no filo fino fino e pò gli arravogliano aglio fuso. Glio fuso alla parte de sotte tè glio corticcio. Quanno è chino glio fuso ,pigliano gli annaspaturo e glio annaspa. Otto fuse le cacciano na matassa. Le matasse se passano alla colata co la cegnera. Ncapo de no iuorno, la femmena le va a lavà e le mette a sciugà. Sciugate le mette aglio vinolo e le trapana e ci fa gli agliuommeri. Pò chiama la ‘tessarella’ e ce fa tela, aiogne, le pezze e ce fa le ‘lenzola’>>.